15.12.2009

Тәуелсіздік күні қарсаңына қарай Жоғарғы Сотта өткен салтанатты жиында еліміздің жоғары сот органының басшысы Мұсабек Әлімбеков ұжымды төл мерекемізбен құттықтады.

М. Әлімбеков өзінің сөзінде «бұл мереке – еліміздің еркіндігі мен тәуелсіздігін әлемге әйгілеген халқымыздың ғасырлар бойы аңсаған арманы. Өткен он сегіз жыл ішінде біздің мемлекетіміз тұстастай бір тарихи дәуірді бастан кешіп, аршынды қадаммен алға басу үстінде. Халқымыздың күш-жігерімен көптеген мақсаттарға қол жетті. Бүгіндері біз еліміздегі көпұлтты, әртүрлі халықтар арасындағы өзара түсіністік пен келісім арқылы ауызбірлікте болып, құқықтық демократияны дамытудағы тура жолымен алға басқанын нық сеніммен айта аламыз», - деп атап өтті. Таңдаған бағытымыздың дұрыстығына әлеуметтік-экономикалық саладағы және мемлекеттік құқық төңірегіндегі өтіп жатқан жағымды қайта құрудағы нақты мысалдар куә болуда дей келе, Мемлекет басшысы Республика судьяларының V съезінде сот жүйесін одан ары дамытудың басымдығын көрсеткен, 2010-2020 жылдарға арналған жаңа Құқықтық саясат тұжырымдамасы белгілеген айқын міндеттерді жүзеге асыру, заманға лайық заң жобаларын дайындап қабылдау – мұның бәрі де біздің еліміздің мемлекеттілігі мен тәуелсіздігін нығайтудың кепілдігі, әрі қолдау болып табылады деп атап көрсеткенін дәйекке келтірді.

М. Әлімбеков Жоғарғы Соттың, облыстық және аудандық соттардың бірқатар судьяларын мемлекеттік наградалармен, сондай-ақ Аппарат қызметкерлерін түрлі белгілермен марапаттады.

Президент Жарлығымен мемлекет пен қоғамға сіңірген еселі еңбегі, еліміздің әлеуметтік-экономикалық және мәдениетін дамытуда, халықтар арасындағы ынтымақ пен достықты нығайтуда қосқан айрықша үлесі үшін «Құрмет» орденімен Жоғарғы Соттың судьялары Марклен Қамназров, Әділ Құрықбаев, Амангелді Рысқалиев, Атыру облыстық сотының төрағасы Жақсылық Аланов, Жамбыл облысының Шу аудандық сотының судьясы Орынбасар Әбеуов, Астана қалалық сотының судьясы Мұрат Нұрабаев және Оңтүстік Қазақстан облыстық сотының судьясы Гүлбану Ағаділова марапатталды.

«Ерен еңбегі үшін» медалімен Семей қаласының ауданаралық әкімшілік сотының төрағасы Аманбай Алдияров және Алматы облысы Іле аудандық сотының судьясы Галина Добросердова марапатталды.
«Қазақстан Республикасының Құрмет грамотасын» Солтүстік Қазақстан облыстық сотының судьясы Мария Лобода алды.

Судьялар одағының шешімімен Жоғарғы Соттың судьясы Ғалия Аққуова «Үш би» төс белгісіне ие болды.

Жоғарғы Сот аппаратының бірқатар қызметкерлері ұжымның Құрмет грамотасы мен Алғыс хатын алды.