Еліміздің «Тәуелсіздік күні» мерекесіне орай Республика Судьялар одағының Ақтөбе филиалы сот қауымдастығы мен құқық қорғау органдары және облыстық сот әкімшілері қызметкерлері арасында футбол жарысын ұйымдастырды. Жарысқа аймақтық Батыс көлік прокуратурасы, Ақтөбе облыстық прокуратурасы, Ақтөбе облыстық соттар Әкімшісінен, жалпы алғанда 6 команда шақырылды. Судьялар командасына капитан қалалық соттың төрағасы С. Төлегенов болды. Оның құрамына облыстық, мамандандырылған ауданаралық экономикалық және Алға аудандық соттарының судьялары кірді.
Салауатты өмір салтын ұстану мақсатында жұмыстан бос уақытында спортпен шұғылданатын судьялар мен прокурорлардың алаңдағы ойынын төрелік етуге қаладағы танымал футбол маманы Николай Юдин шақырылды.

Судьялар мен прокуратура қызметкерлері арасында мұндай жарыстар жиі өткізіліп тұратындығын айта кеткен жөн.

Биыл ел тәуелсіздігінің 18 жылдығына орай ұйымдастырылған футбол додасының ақтық ойынына Ақтөбе облысы сот қауымдастығы мен аймақтық көлік прокурорлары командалары шығып, алтын жүлделерді сарапқа салды. Ойын барысында екі команда ойыншылары да жақсы дайындығымен, жеңіске деген зор ынтасымен көзге түсті. Нәтижесінде көлік прокурорлары жеңіске жетіп, алтын медальдарды иеленді. Күміс жүлде облыстық сот қауымдастығының командасына бұйырды.