Қазақстан Республикасы Жоғарғы Сотының қадағалау алқасының төрағасы Анатолий Смолин облыстағы судьялар қауымдастығына Шығыс Қазақстан облыстық сотының төрағасы лауазымына жаңадан тағайындалған Мұхамеджан Пақырдіновті таныстырды.

М.Пақырдінов 1950 жылғы Қызылорда облысы Жаңақорған ауданының Бірлік кентінде дүниеге келген. 1973 жылы С. М. Киров атындағы Қазақ мемлекеттік университетін заң факультетін бітірген. Еңбек жолын прокуратура органдарында бастаған. 1977-1985 жылдары Алматы қалалық сотының, Қазақстан Республикасы Жоғарғы Сотының судьясы болып қызмет атқарған. Прокуратура органдарында қатардағы тергеушіден бастап облыс прокурорына дейін көтерілген. Батыс Қазақстан, Шығыс Қазақстан, Жамбыл облыстарының прокуроры болған. 2003 жылдың сәуір айынан бастап Президент Әкімшілігінің мемлекеттік-құқықтық бөлімі меңгерушісінің орынбасары, 2004 жылдың желтоқсанынан бастап Қарағанды облыстық сотының төрағасы болды.

Анатолий Смолин өзінің сөзінде: «Облыстық соттың басшылығына тағайындалған Мұхамеджан Ахмедияұлының тәжірибесі мол маман. Ол 20 жыл прокуратура органдарында, 15 жылға жуық сот жүйесінде қызмет атқарып келді. Алдағы уақытта облыстағы сот жүйесінің алдыңғы қатарлардан, тек қана биіктен көрінуіне өз үлесін қосып, Елбасы артқан сенімді ақтайды деп ойлаймын» деді.